વર્લ્ડ કપ હોકીમાં ભારતનો શાનદાર દેખાવ જારી, કેનેડા સામે 5-1થી ભવ્ય વિજય
એજન્સી, ભુવનેશ્વર:
મેચની અંતિમ ક્ષણોમાં ઢીલાશ દાખવવાને કારણે ભારતે ભૂતકાળમાં ઘણી મેચ ગુમાવી છે અને આ વખતે તેનું પુનરાવર્તન થવાની દહેશત હતી, પરંતુ ભારતીય ખેલાડીઓએ છેલ્લી કેટલીક મિનિટોમાં અદભૂત રમતનું પ્રદર્શન કરતાં વર્લ્ડ કપ હોકીમાં ભારતે શનિવારે કેનેડાને 5-1ના વિશાળ સ્કોરથી હરાવીને ક્વાર્ટર ફાઇનલમાં સીધો પ્રવેશ કરી લીધો હતો.
શનિવારે જ રમાયેલી એક અન્ય મેચમાં સાઉથ આફ્રિકા સામે બેલ્જિયમનો વિજય થતાં ભારત માટે આ મેચ જીતવી જરૂરી હતી. ભારત આ મેચ હારી જાય અથવા તો ડ્રો થાય તો તેને લીગ રાઉન્ડમાં ક્રોસઓવર મેચ રમવાની નોબત આવે તેમ હતી, પરંતુ કેનેડા સામે વિજય હાંસલ કરીને ભારતે ક્વાર્ટર ફાઇનલમાં પ્રવેશ કરી લીધો હતો.
મેચની 15મી મિનિટે ભારતને પેનલ્ટી કોર્નર મળ્યો હતો, જેમાં તેણે ગોલ નોંધાવવામાં સફળતા હાંસલ કરી હતી. આ તબક્કા સુધી બંને ટીમ સમાંતર ચાલી રહી હતી, પરંતુ પ્રથમ હાફ વખતે ભારત 1-0ની સરસાઈ પર આવી ગયું હતું. મનપ્રિત સિંઘની ફ્લિકમાં હરમનપ્રિતે કોઈ ભૂલ કરી ન હતી અને ટીમને સરસાઈ અપાવી દીધી હતી. વિરામ બાદ કેનેડાએ આકર્ષક રમત દાખવી હતી અને 39મી મિનિટે સ્કોર સરભર કરી દેતાં ભારતીય કેમ્પમાં દહેશત પ્રસરી ગઈ હતી. જોકે ચોથા ક્વાર્ટરના પ્રારંભે ચિંગ્લેસાના કંગુજામે ભારતને ફરીથી સરસાઈ અપાવી દેતો ગોલ નોંધાવ્યો હતો. આ સાથે ભારત 2-1થી આગળ થઈ ગયું હતું.
મેચનો ચોથો અને અંતિમ ક્વાર્ટર ભારતની તરફેણમાં રહ્યો હતો કેમ કે અંતિમ ક્ષણોમાં ભારતે અત્યંત આક્રમક રમતનું પ્રદર્શન કર્યું હતું.
અહીંના કલિંગા સ્ટેડિયમ ખાતે રમાયેલી મેચમાં લલિત ઉપાધ્યાયે કેનેડિયન ખેલાડી કિગાન પરેરાને છક્કડ ખવડાવી દીધી હતી અને સ્કોર 3-1 કરી નાખ્યો હતો. લલિતે તેની સ્કીલ દાખવવાનું જારી રાખીને ભારતનો પાંચમો ગોલ અદભૂત રીતે કર્યો હતો. કેનેડાના ખેલાડીઓએ તેને ઘેરી લીધો હતો અને તેમની વચ્ચે રહીને તેણે ભારતને પાંચમો ગોલ અપાવ્યો તે અગાઉ પણ ભારતે એક ગોલ કરી નાખ્યો હતો.