(જી.એન.એસ.)રાજકોટ,
કોઠારીયા રણુજા મંદિર પાસે રહેતો બાવાજી યુવાને ફેસબૂક દ્વારા એક ૧૪ વર્ષની બાળા સાથે પ્રેમ થઈ ગયો હતો. જે બાદ તે બાળાને ચોટીલા ફરવા લઇ ગયો હતો, જેની જાણ પરિવારને થઈ જતાં બાળાના પિતા સહિતના લોકોએ બાવાજીના યુવાનની ધોલાઈ કરી હતી. બાળાના પરિવારે યુવકને માલધારી ફાટક પાસે આવેલા કારખાનામાં બોલાવ્યો હતો અને તેની ધોલાઈ કરી હતી.
ઘટનાની વિગત અનુસાર કોઠારીયા રણુજા મંદિર પાસે જયનગરમાં રહેતાં દિવ્યેશ તુલસીભાઇ ગોંડલીયા (ઉ.૧૯) નામના બાવાજી યુવાનને નજીકના વિસ્તારમાં રહેતી ૧૪ વર્ષની બાળા સાથે ફેસબૂક થકી ઓળખાણ થયા બાદ બંને વચ્ચે પ્રેમ થયો હતો. તે શનિવારે આ બાળાને બાઇકમાં બેસાડી ચોટીલા દર્શન કરવા લઇ ગયો હતો. આ અંગે બાળાના પરિવારજનોને ખબર પડી જતાં સાંજે બાળાના પિતાએ તેને પોતાના કારખાને વાતચીત કરવા બોલાવ્યા બાદ બીજા ચાર જણા સાથે મળી ધોકા અને પ્લાસ્ટીકના પાઇપથી બેફામ માર મારતાં યુવકને ગંભીર ઈજા પહોંચી હતી. જેથી યુવકને હોસ્પીટલમાં દાખલ કરવામાં આવ્યો હતો.
માલધારી ફાટક પાસે આવેલા બાલાજી ઇન્ડસ્ટ્રીઝ એરિયા-૨માં આવેલા શિવ એન્ટરપ્રાઇઝ નામના કારખાનામાં ચંદ્રેશભાઇ ગજેરા અને રમણીકભાઇ સહિતનાએ માર માર્યો હોવાની ફરિયાદ દિવ્યેશે પોલીસને કરી હતી. જેથી પોલીસે ચારેય શખ્સો સામે ગુનો નોંધી તપાસ શરૂ કરી છે.
