સુરત જિલ્લામાં છેલ્લા બે દિવસથી ભારે વરસાદ વરસી રહ્યો છે. જેના કારણે પાણીની રેલમછેલ થઈ રહી છે. જેમાં બુધવારે સવારે છ વાગ્યા થી લઈને આજે ગુરુવારે સવારે છ વાગ્યા સુધીના 24 કલાકમાં દેમાર વરસાદ ઝીંકાયો છે. આ વરસાદમાં સુરત નજીકના કામરેજ તાલુકામાં 9.5 ઇંચ, માંડવીમાં 7.5 ઇંચ અને સુરતમાં 7 ઇંચ વરસાદ નોંધાયો હતો.
આ વરસાદનું પાણી સીધું સુરત સ્થિત તાપી નદીમાં ઠલવાતા કોઝવેમાં હેવી ઇન્ફલો આવતા ઓવરફ્લો થતાં લોકોની અને વાહનોની અવરજવર માટે બંધ કરી દેવાયો છે. હાલ કોઝવેની ભયજનક સપાટી 6 મીટર થી ઉપર 6.12 મીટરે પાણી વહી રહ્યું છે. આમ ચોમાસાની પ્રથમ રાઉન્ડમાં જ કોઝવે બંધ કરી દેવાયો છે.
