તમને દવાની સ્ટ્રીપમાં બે વસ્તુઓ મુખ્યત્વે જોવા મળશે. દરેક ટેબ્લેટ વચ્ચે જગ્યા હોય છે અને કેટલીકવાર અમુક ટેબ્લેટની જગ્યા ખાલી પણ હોય છે. જોકે હકીકત એ છે કે આ કોઈ ભૂલ નથી અને તેના માટે ખૂબ ચોક્કસ કારણો છે. તમારા મનમાં વારંવાર આવતા આ સવાલનો જવાબ અહી આપવામાં આવ્યા છે. દવાઓ વચ્ચેની ખાલી જગ્યા દવાઓના કેમિકલને એકસાથે ભળતા અટકાવે છે. તેનાથી દવાઓ બગડતી નથી. આ દવાઓ વચ્ચેની સ્પેસને કારણે કોઈપણ પ્રકારના રિએક્શન થવાનું જોખમ રહેતું નથી. દવાઓ સાચવવા માટે આ પ્રકારની પદ્ધતિ અપનાવવામાં આવે છે. કેટલીકવાર આ જગ્યા સ્ટ્રીપ કાપવા માટે પણ આપવામાં આવતી હોય છે. સ્ટ્રીપમાં રહેલ આ જગ્યા દવાઓને ગમે ત્યાં લાવવા-લઈ જવા માટે રાખવામાં આવે છે. તે એક રીતે કુશનિંગ ઈફેક્ટ/ગાદી જેવું કામ કરે છે. તેને કારણે દવાઓ એકસાથે ભળતી નથી અને તેને એકસાથે લઈ જવામાં સરળતા રહે છે. આ ખાલી જગ્યાઓને કારણે જ દવાઓ પેકેજિંગ મશીનની વચ્ચે અટકતી નથી. આ સિવાય એક જગ્યાએ એક પ્લાન્ટમાં બનતી દવાને દેશ-વિદેશમાં મોકલાવાની પણ હોય છે તેથી દવાને ઉચ્ચ દબાણથી બચાવવા અને તેને ઘસારાથી સુરક્ષિત રાખવા માટે અમુક વખતે વધુ જગ્યા અથવા ખાલી શેલ જરૂરી બને છે. જો આ દવાના પત્તા પર વધુ દબાણ સર્જાય અથવા રફ હેન્ડલિંગ હોય તો નુકસાન દવાને નહીં પણ ખાલી શેલને થાય છે. જોકે એક મહત્વની વાત એ પણ છે કે, ઘણી વખત તમે એ પણ જોશો કે, દવાની સ્ટ્રીપમાં માત્ર એક જ ગોળી હોય છે. ડોક્ટર ઘણી વખત ડોઝનો ખાસ ખ્યાલ રહે તેવી દવા લખતા હોય છે. જો સ્ટ્રીપમાં એક જ દવા હોય તો દવા ગણવી વધુ સરળ થઈ જાય છે અને કોઈ કન્ફ્યુઝન રહેતું નથી. આ સિવાય સ્પેસની પાછળનું એક કારણ પ્રિન્ટ એરિયા વધારવાનું પણ છે. કેટલીકવાર દવાના આખા પત્તામાં એક જ ગોળી હોય છે. આવી સ્થિતિમાં, કાર્ડના પાછળના ભાગમાં પ્રિન્ટ કરવાની તારીખ, દવામાં ઉપયોગમાં લેવાયેલી સામગ્રી, એક્સપાયરી ડેટ વગેરે જેવી માહિતી છાપવા માટે જગ્યાની જરૂર પડે છે. આ માટે ખાલી જગ્યાઓ રાખવામાં આવે છે.
