ઉપરાષ્ટ્રપિ જગદીપ ધનખડ કિંગ ચાર્લ્સ તૃતીયના રાજ્યાભિષેકમાં હાજરી આપવા લંડન પહોંચ્યા
ભારતીય મૂળના વર્તમાન અને પૂર્વ સાંસદો સાથે કરી વાતચીત, પીએમ મોદીના નેતૃત્વની કરી પ્રશંસા
રાહુલ ગાંધી પર નિશાન સાધ્યું
ઉપરાષ્ટ્રપતિ જગદીપ ધનખડે લંડનમાં ભારતીય મૂળના પૂર્વ અને વર્તમાન સંસદસભ્યો સાથે પણ વાતચીત કરી હતી. આ દરમિયાન તેમણે કેમ્બ્રિજ યુનિવર્સિટી વિશે રાહુલના નિવેદન પર કટાક્ષ કર્યો અને કહ્યું કે જો કોઈ સાર્વજનિક સ્થળો પર સત્ય અને પાયા વગરની વાત કરે છે તો કોઈ તેના પર વિશ્વાસ કરતું નથી. તેના શબ્દો ક્યાંય ટકતા નથી. ધનખડે વધુમાં કહ્યું કે પ્રામાણિક અભિપ્રાય દેશ માટે ઉપયોગી હોય છે, પરંતુ દૂષિત ટિપ્પણીઓને નકારી કાઢવી જોઈએ.
પીએમ મોદીના વખાણ કર્યા
જગદીપ ધનખડે જણાવ્યું હતું કે જો આપણે ભારતના ત્રણ અંગો – વિધાનસભા, ન્યાયપાલિકા અને કાર્યપાલિકા પર નજર કરીએ તો તમને જણાશે કે વડાપ્રધાન નરેન્દ્ર મોદીના નેતૃત્વ હેઠળની કાર્યપાલિકા તમામ સામાજિક માપદંડોના અકલ્પનીય સ્તરે માનવતાનું કામ કરી રહી છે અને તેમણે લોકોની તકલીફો ઓછી કરવા માટે શક્ય તેટલું બધું કામ કર્યું છે. સામાન્ય માણસને સશક્ત પણ કર્યા.
ભારતીય ન્યાયતંત્રની પ્રશંસા
ધનખડે ભારતીય ન્યાયતંત્રની પ્રશંસા કરતા કહ્યું કે દેશમાં ન્યાયતંત્ર ટોચની અદાલતથી લઈને તળિયે સુધી “મજબૂત” છે. તેમણે ભારપૂર્વક જણાવ્યું હતું કે સામાન્ય માણસ માટે ભારતીય ન્યાયતંત્રની પહોંચનો કોઈ મુકાબલો નથી. આ સમયે આપણી પાસે ભારતના મુખ્ય ન્યાયાધીશ તરીકે સૌથી વધુ પ્રબુદ્ધ વ્યક્તિઓમાંથી એક છે, જે વિશાળ અનુભવ, પ્રતિબદ્ધતા, જુસ્સાથી ભરેલી વ્યક્તિ છે અને તે ખૂબ પ્રતિભાશાળી છે.
રાહુલે સંસદ અને ન્યાયતંત્ર પર સવાલો ઉઠાવ્યા હતા
આ વર્ષે કેમ્બ્રિજ યુનિવર્સિટીમાં વિદ્યાર્થીઓને સંબોધિત કરતા કોંગ્રેસ નેતા રાહુલ ગાંધીએ ભારતીય લોકશાહી ખતરામાં હોવાની વાત કરી હતી. રાહુલે કહ્યું હતું કે ભારતની સ્વતંત્ર સંસ્થાઓ પણ જોખમમાં છે અને આરએસએસ દ્વારા હાઇજેક કરવામાં આવી છે.
